Rəbbinin yoluna hikmətlə, gözəl öyüd-nəsihətlə dəvət et və onlarla ən gözəl tərzdə mübahisə et. Şübhəsiz ki, Rəbbin azğınlığa düşənləri də, doğru yolda olanları da yaxşı tanıyır. (Nəhl 125)
Əvvələ qayıt
Tövbə necə edilməlidir?
Vaaleykum salam va rahmayullah!
Böyük günahların bağışlanması üçün tövbə şərtdir. Uca Allah buyurur: “Ey iman gətirənlər! Allaha səmimi-qəlbdən tövbə edin. Ola bilsin ki, Rəbbiniz günahlarınızın üstünü örtsün və sizi ağacları altından çaylar axan Cənnət bağlarına daxil etsin” (Ət-Təhrim: 8). Səmimi-qəlbdən edilən həqiqi tövbənin isə dörd şərti vardır:
1. Yol verilmiş günahdan uzaq durmaq: Əgər həmin günah tərk edilməsi vacib olan bir asilikdirsə, o asilik tərk edilməlidir. Yox, əgər həmin günah əməl edilməsi vacib olan bir ibadətin tərki ilə əlaqəlidirsə, həmin ibadət yerinə yetirilməlidir. Əgər günah hər hansı bir kəsin haqqı ilə əlaqəlidirsə, o zaman həmin kəsin haqqı ödənilməli, yaxud halallıq alınmalıdır;
2. Səmimi-qəlbdən peşmançılıq: Peyğəmbər (Allahın ona salamı olsun!) demişdir: “Peşmançılıq tövbədir” (İbn Macə, 4252, Əlbani “Səhihul-cəmi”, 6802) Yəni peşmançılıq tövbənin əslidir və əsas rükünlərindəndir;
3. Bir daha həmin günaha qayıtmayacağına dair söz vermək və bu istiqamətdə əzmkar olmaq;
4. Tövbənin, qəbul olunma vaxtında olması: Uca Allah iki hal istisna olmaqla bəndənin tövbəsini hər zaman qəbul edir. Həmin iki hal:
Birincisi: Günəşin (Qiyamət gününə yaxın) batdığı yerdən çıxması: Peyğəmbər demişdir: “Günəş batdığı yerdən çıxmayınca Qiyamət qopmaz. Batdığı yerdən çıxdıqda insanlar onu görəcək və hamı iman edəcəkdir. Həmin vaxt isə imanın heç kəsə fayda vermədiyi vaxtdır” (Buxari, 4636)
İkincisi: Can boğaza gələndə: Uca Allah buyurur: “Günah işlər görməkdə davam edərək ölüm yetişən anda: “Mən indi tövbə etdim” deyənlərin və kafir olaraq ölənlərin tövbəsi qəbul olunmaz. Biz onlar üçün şiddətli bir əzab hazırlamışıq!” (ən-Nisa, 18) Peyğəmbər (Allahın ona salamı olsun!) demişdir: “Can boğaza gələnə qədər Allah qulunun tövbəsini qəbul edir” (Tirmizi, 3537, İbn Macə, 4253, Əlbani “Səhihul-cəmi”, 1903)