Ramazan ayı İslamda ən fəzilətli aylardan biridir. Bu ayda Qurani-Kərim nazil olmuş, oruc ibadəti fərz qılınmış və savablar qat-qat artırılmışdır. Ramazan mömin üçün nəfsi tərbiyə, qəlbi təmizləmə və Allaha yaxınlaşma fürsətidir.

1. Oruc tutmaq
Ramazanın əsas ibadəti orucdur. Oruc sübh azanından gün batana qədər yemək, içmək və orucu pozan digər əməllərdən çəkinməkdir.
“Ey iman gətirənlər! Oruc sizdən əvvəlkilərə fərz edildiyi kimi sizə də fərz edildi ki, bəlkə təqvalı olasınız.” (əl-Bəqərə, 2/183)
Oruc təkcə ac qalmaq deyil, eyni zamanda dili, gözü, qulağı və qəlbi günahlardan qorumaqdır.

2. Qurani-Kərimi oxumaq və təfəkkür etmək
Ramazan Qurani-Kərim ayıdır. Bu ayda Qurani daha çox oxumaq, mənalarını düşünmək və onunla əməl etmək tövsiyə olunur.
“Ramazan ayı elə bir aydır ki, insanlara hidayət olan, doğru yolu və haqqı batildən ayıran açıq-aşkar dəlilləri olan Quran bu ayda nazil edilmişdir.” (əl-Bəqərə, 2/185)
Sələf alimləri Ramazanda digər nafilə ibadətləri azaldıb Qurana daha çox vaxt ayırardılar.

3. Təravih namazı
Təravih Ramazan gecələrinə məxsus sünnə namazdır. Peyğəmbər ﷺ bu namazı təşviq etmişdir
“Kim Ramazan gecələrini imanla və savabını Allahdan umaraq namazla keçirərsə, onun keçmiş günahları bağışlanar.” (Buxari, Müslim)

4. Dua və zikr
Ramazan ayı duaların qəbul olunduğu bir aydır. Xüsusilə iftar vaxtı edilən dualar rədd olunmaz.
“Üç kəsin duası geri qaytarılmaz: oruclunun iftar edənədək duası, ədalətli rəhbərin duası və məzlumun duası.” (Tirmizi)
Zikr, istiğfar və salavat Ramazanda daha da artırılmalıdır.

5. Sədəqə və xeyriyyə
Ramazan ayı səxavət ayıdır. Peyğəmbər ﷺ Ramazanda daha səxavətli olardı.
“Rəsulullah insanların ən səxavətlisi idi. Ramazanda isə küləkdən də səxavətli olardı.” (Buxari, Müslim)
Kasıblara kömək, iftar vermək və ehtiyacı olanlara sədəqə vermək böyük savabdır.

6. Tövbə və istiğfar
Ramazan günahlardan təmizlənmə ayıdır. Səmimi tövbə edib Allahdan bağışlanma diləmək bu ayın ən mühüm əməllərindəndir.
“Ey iman gətirənlər! Allaha səmimi tövbə edin.” (ət-Təhrim, 66/8)

7. Qədr gecəsini axtarmaq
Qədr gecəsi Ramazanın son on gecəsindədir və min aydan daha xeyirlidir.
“Qədr gecəsi min aydan xeyirlidir.” (əl-Qədr, 97/3)
Bu gecələrdə namaz, dua və zikr artırılmalıdır.

Xülasə Ramazan ayı mömin üçün il boyu qazana bilməyəcəyi qədər savab və mənəvi qazanc əldə etmək fürsətidir. Bu ayı oruc, namaz, Quran, dua və gözəl əxlaqla dəyərləndirən kəs böyük mükafata nail olar.